Operacion « Sakado »

L’operacion « Sakado » es estada creada en 2005 per una associacion de Montpelhièr ; mas es presenta uèi dins força vilas de França. Aqueste projecte permet de collectar de sacas d’excursionista emplenadas d’objectes utiles per los distribuir als sens-ostal, entre Nadal e lo jorn de l’an, gràcia a l’ajuda d’organismes coma lo SAMU social, la Crotz-Roja, etc.

Lo principi es d’emplenar una saca d’excursionista de 25 a 30 litres de quatre lòts :
- Lòt Sakado calor : pul, caucetas, cobèrta…
- Lòt Sakado igièna : bròssa, fretadents, dentifrici, mocadors, sabon…
- Lòt Sakado festiu : quicòm que permet de faire la fèsta.
- Lòt Sakado cultura-comunicacion : libres, timbres, papièr de letras, ràdio, lampa de pòcha…
Podètz apondre fòrça causas per personalizar vòstre sac : per exemple, un mot d’encoratjament fa totjorn plaser.

Çò qu’es plan es que podètz emplenar lo sac a mai d’un ; doncas, quitement s’avètz pas tròp d’argent, cadun crompa quicòm pendent sas crompas e vaquí !

Per ne saber mai, podètz anar sus lo site, o mandar un mail a l'associacion.

Alara, fasètz-vos Paire Nadal : Ofrètz un « Sakado » !

La causida de l'occitan a la facultat

Vos vai presentar mon trajècte d’estudianta qu’es un exemple entre autres de la causida de l’occitan a la facultat.

Voliái faire professor de las escòlas dempuèi fòrça temps. Aimavi fòrça la literatura e m'avián dich que los estudis de letras modèrnas son plan fachas per lo concors que voliái faire. Al licèu, ai passat mon BAFA perque voliái faire una formacion en ligam amb los enfants. Puèi, ai trabalhat amb los enfants coma animatritz ; aquò m’a mostrat qu’èra plan çò qu’aimariái faire.

Doncas soi anada en letras modèrnas a la facultat ; mas al moment de causir mon opcion, voliái causir quicòm de diferent de çò qu’aviái fach al licèu. Ai pres occitan perque aquesta lenga fa partida del patrimòni e de la cultura de ma region ; mas tanben perque mos grands utilizan quauques expressions occitanas.
Pendent un an, ai fach de cors de non-especialistas e aquò m’a agradat fòrça.
Alara amb Lisa, qu’es dins ma classa ara, avèm decidit de faire la licéncia d’occitan. Doncas fasiái l’an d’après una dobla licencia de letras modèrnas e d’occitan.
La dobla licéncia es un pauc dificil amb las oras de cors, los oraris e lo trabalh ; mas aquò permet de ganhar de temps, de pas faire doas licéncias una aprèp l’autra.
Es un pauc estranh a la debuta perque l’ambient de las doas licéncias es completament diferent. En occitan, sèm pas nombroses, l’ambient es amical entre los estudiants mas tanben amb los professors ; i a tanben un trabalh seguit que sembla al licèu. Alara qu’en letras modèrnas, sèm nombroses e los professors fan pas tròp atencion als estudiants.

Aquela dobla licéncia me permet d’accedir al concors de professor de las escolas, lo CRPE, amb l’especialitat lengas regionalas. Dins l’acadèmia de Monpelhièr, aquel concors se passa a Menda e a Carcassona ; iéu vau anar a Carcassona. Las espròvas càmbian pas mas i a en mai una espròva orala d’occitan e una espròva escricha d’occitan.
Amb aquel concors, pòdi ensenhar dins las escòlas publicas normalas e dins las escòlas publicas bilingas. Doncas pensi qu’es plan perque ai fòrça causidas per ma vida professionala.

Bonjorn ! :-)

Bonjorn !

Me presenti : m’apèli Laura e ai 20 ans.
Soi en tresena anada de letras modèrnas e en segonda annada de LLCER d’occitan.
Aqueste blòg contendrà d'articles que presentaràn diferents subjectes coma per exemple sus l’exposicion de l'art de Caravage, un artista italian del sègle 16, qu’ai vist amb una amiga, mas tanben sus Ardaillers, un vilatge de Cevènas o sus qualques libres qu’ai legits e qu’ai aimats fòrça.
Aqueste primièr article anóncia la dralha que va seguir aquel blòg pendent lo semestre de l’annada 2012/2013.

Per lo cors de lenga, nòstra professora, Melania Laupies, nos a demandat de faire un blòg ont expausarem los articles de nostra causida, que los subjèctes seràn personals o non.
Puèi, deurem tanben realizar e participar a doas emissions de ràdio sus Ràdio Lenga d’Òc, sus un subjècte que causissèm.
Aquel projècte serà un trabalh de grop perque pendent los cors de lenga anam preparar aquelas doas emissions.
Lo subjècte de la primièra emission serà l’occitan a la facultat Paul Valery (manifestacions, concèrts, grops de musica, sortidas, animacions…).

En mai d’aquel trabalh, anam deure faire d’expausats ; vau faire lo mieu sus Occitanica que es una mediatèca d’obratges numerizats en linha.
Devèm tanben mandar un de nòstres articles a un jornal occitan en linha e ensajar de se faire publicar ; per aquò podem aver un 20/20… En fach, entre 18 e 20 segon l’umor de Melania J.
M'agrada pas gaire d'escriure un blog per lo mostrar a tot lo monde donc serà un blog son que per Melania e per los L2.

Alara bona lectura… Vos disi a lèu ! Potons !